Kinamayú ang tawag sa wika ng mga Kamayú na naninirahan sa lalawigan ng Surigao del Sur, partikular sa mga bayan ng Barobo, Bislig, Hinatuan, Lianga, Lingig, Marihatag, at Tagbina. May mangilan-ngilan ding nagsasalita nitó sa Agusan del Norte, Agusan del Sur, at sa bayan ng Boston, Davao Oriental. 

          Tanging Kinamayú lámang ang wikang ginagamit ng grupo sa loob ng kanilang komunidad. Bagaman ginagamit ang Filipíno at Inglés sa paaralan, sinasalita lámang ang mga wikang ito kapag itinuturo ang mga asignaturang Filipíno at Inglés dahil Kinamayú pa rin ang midyum na ginagamit ng mga guro sa pagtuturò.

          Bukod sa kanilang katutubong wika, marunong din ang mga Kamayú ng Surigawnón at Sebwáno na kanila namang natutuhan sa labas ng komunidad.