Ang wikang Pangasinán ay isa sa mga pangunahing wika sa Pilipinas.  Ito ang wikang sinasalita sa lalawigan ng Pangasinan partikular sa mga bayan ng Basista, Bayambang, Binmaley, Calasiao, Dagupan, Malasiqui, Mangaldan, Mangatarem, Mapandan, Pozorrubio, San Carlos, San Fabian, San Jacinto, Santa Barbara, at Urbiztondo.  May mga nagsasalita rin nito sa mga bayan ng Anao, Camiling, Gerona, Lungsod Tarlac, Mayantoc, Moncada, Panique, Pura, Ramos, San Clemente, San Manuel, Santa Ignacia, at Victoria sa lalawigan ng Tarlac, at sa ilang lugar sa La Union. Parehong ginagamit ang  Pangasinan at Pangasinense bilang pantukoy sa pangalan ng pangkat na gumagamit ng wikang Pangasinan.

Halos kalahati ng populasyon ng Pangasinan ay binubuo ng mga Pangasinénse, habang ang natitira ay grupo ng mga dayong Ilokáno na naninirahan na sa silangan at  kanlurang bahagi ng lalawigan.