Ang Repositoryo ng mga Wika ng Pilipinas ay isang onlayn na imbakan ng mga impormasyon, sanggunian, dokumentasyon, at iba pang kaugnay na mga pag-aaral sa wika ng mga katutubong pamayanang kultural sa bansa. Isa itong proyekto ng Komisyon sa Wikang Filipino (KWF) na naglalayong madalîng maipaabot sa publiko ang mga datos at pag-aaral hinggil sa mga katutubong wika ng Pilipinas. Ang mga impormasyong matatagpuan dito ay búnga ng mga saliksik ng KWF sa pakikipagtulungan sa mga iskolar ng wika, akademya, institusyon, ahensiya ng pamahalaan, at mga pinunò at kasapì ng mga katutubong pamayanang kultural. 

Isa sa mga tampok na impormasyon na makikíta sa Repositoryo ay ang onlayn na bersiyon ng Atlas ng mga Wika ng Filipinas na inilimbag ng KWF noong 2016. Naglalaman ito ng mga datos hinggil sa tinatáyang 130 wika ng bansa at mapa ng mga wika. Makikíta rin dito ang resulta ng mga pananaliksik sa wika at kultura ng ilang katutubong pamayanang kultural na sinimulan ng KWF noong 2015 at ipinagpatúloy noong 2018 sa pamamagitan ng Lingguwistikong Etnograpiya ng Pilipinas. Naglalaman ito ng mga impormasyon hinggil sa sitwasyong pangwika at materyal at di-materyal na kultura ng komunidad. Matatagpuan din dito ang kopya ng mga binuong ortograpiya ng KWF, katuwang ang komunidad at iba pang institusyon.

Isang patuluyang proyekto ang Repositoryo kayâ ang ilang mga wika ay hindi pa naidodokumento, may mga impormasyong maaaring magkaroon ng rebisyon, at patuloy itong idedevelop sa pagdaan ng panahon.