Áyta Kadí ang tawag sa wika ng grupong Áyta Kadí na naninirahan sa mga bayan ng Alabat, Catanauan, at Lopez sa lalawigan ng Quezon; at sa Barangay Putingkahoy sa bayan ng Rosario sa lalawigan ng Batangas. 

          Dahil Tagálog ang lingua franca sa Quezon, ito rin ang wikang mas ginagamit ng mga Áyta Kadí kaysa sa kanilang katutubong wika. Sa katunayan, karamihan sa kabataang Áyta Kadí ay hindi na natuto ng kanilang wika at sa halip ay nakagisnan na ang paggamit ng wikang Tagálog kasabay ng Filipíno at Inglés na ginagamit na wikang panturo sa paaralan.