Ang Bugkalut ay ang wika ng grupong Bugkalút na naninirahan sa Nueva Vizcaya. Isa ang Bugkalút sa siyam na pangunahing katutubong grupo sa lalawigan, at matatagpuan silá partikular sa mga bayan ng Alfonso Castañeda, Dupax del Sur, Dupax del Norte, at Kasibu. May mga Bugkalot rin na naninirahan sa lalawigan ng Quirino, Aurora, at ilang bahagi ng Nueva Ecija. 

          Bukod sa mga Bugkalut, naninirahan din sa Nueva Vizcaya ang mga grupong Ifugáw, Kalíngga, Ilokáno, Tagálog, Isináy, Kalangúya, Kankanaëy, Ibalóy, at Dumágat—at ang wikang Ilokáno na lingua franca sa rehiyon ang nagbubuklod sa mga grupong ito. Bukod sa Bugkalut at Ilokáno, nakaiintindi at nakapagsasalita rin ang mga katutubo, lalo na ang mga nakapag-aaral, ng wikang Filipíno at Inglés na mga wikang panturo sa paaralan.