Isa ang Ilokáno sa mga pangunahing wika sa Pilipinas at ikatlong pinakamalaking wika batay sa bílang ng mga tagapagsalita. Ito ang lingua franca sa Hilagang Luzon at ang pangunahing wika sa lalawigan ng Ilocos Norte, Ilocos Sur, La Union, Abra, Pangasinan, Cagayan. Sinasalita rin ito sa kalakhan ng rehiyon ng Lambak Cagayan at Cordillera Administrative Region bílang lingua franca. Tinatawag ng grupo ang kanilang sarili at wika sa parehong pangalan—Ilokáno—at sa ganitong pangalan din silá kilalá ng mga tagalabas bagaman nagagamit din ang terminong Ilóko o Ilúku. 

          Ilokáno ang unang wikang natutuhan ng mga batàng Ilokáno. Karaniwang ito na ang wikang kanilang gagamitin hanggang sa pagtanda kahit pa matutuhan ang ibang wika tulad ng wikang Filipíno at Inglés na kadalasang natututuhan mula sa paaralan.