Ang Isináy ay ang wika ng mga katutubong Isináy na isa sa siyam na pangunahing pangkating etniko na naninirahan sa lalawigan ng Nueva Vizcaya. Matatagpuan silá partikular sa bayan ng Bambang, Aritao, at Dupax del Sur na itinuturing na sentro ng grupo. 

          Nakapaligid ang mga grupong Kalangúya, Ilokáno, Tagálog, Kapampángan, at Pangasinán sa lugar ng mga Isináy. Dahil dito, hindi maiwasang matutuhan nilá ang alinman sa wika ng mga nabanggit na grupo. Marunong din silá ng Ilokáno na rehiyonal na wika sa lalawigan. Natututuhan na rin ng mga batàng Isináy ang Filipíno at Inglés na mga wikang panturo sa paaralan.*

*datos mula sa isinagawang dokumentasyon ng KWF noong 2018