Kasiguránin ang wikang sinasalita ng grupong Kasiguránin na naninirahan sa bayan ng Casiguran sa lalawigan ng Aurora. Kasiguránin at Tagálog ang lingua franca sa Casiguran. Sabay na itinuturo ang dalawang wika sa mga batàng Kasiguránin hábang natutuhan nilá ang ilan sa mga wika ng mga grupong nakapalibot sa kanila gaya ng Agtâ at Ilokáno. 

          Sa mga paaralan, Filipíno at Inglés ang ginagamit na mga wikang panturo bagaman sinisimulan nang gamítin ang wikang Kasiguránin sa pagtuturo sa mga batà bílang bahagi ng kurikulum ng edukasyon.