Ang Tagakawló ay ang wika ng mga katutubong Tagakawló na naninirahan sa Malungon at Alabel sa lalawigan ng Sarangani.

          Tagakawló ang kadalasang unang wikang natututuhan ng mga katutubong Tagakawló bagaman may ilan na hindi na natuto nito dahil sa intermarriage o pakikipag-asawa ng mga katutubo sa mga dayo o sa mga miyembro ng ibang pangkating etniko tulad ng Hiligaynón, Sebwáno, at Tagálog. Dahil dito, marami na sa mga Tagakawló ang nakapagsasalita rin ng wika ng mga nasabing grupo. Ang mga Tagakawló sa bayan ng Malungon, na kasámang naninirahan ng grupo ng mga Bláan, ay natuto na rin ng wikang Bláan.