Agtâ Dumágat Umíray ang tawag sa wika ng grupong Dumágat na matatagpuan sa lalawigan ng Quezon, partikular sa mga bayan ng Burdeos, General Nakar, Mauban, Panukulan, Polillo, at Real.

       Karamihan sa mga Dumágat ay nakapagsasalita ng Umíray o Umírey, bagaman may ilan nang komunidad na hindi na halos nagsasalita nitó, tulad sa Barangay Lubayat sa bayan ng Real na pawang matatandang Dumágat na lámang ang nakapagsasalita ng kanilang katutubong wika. Mas pinipili na ring gamítin ng karamihan ang wikang Tagálog na lingua franca sa lalawigan. Natututuhan na rin ng kabataan, lalo na ang mga nakapag-aaral, ang Filipíno at Inglés na mga wikang panturo sa paaralan.