Butwánon

          Ang Butuánon ay ang wikang sinasalita ng mga katutubong Butuánon na naninirahan sa Lungsod Butuan, lalawigan ng Agusan del Norte. 

          Tinatawag na riverine language ang Butuánon dahil sinasalita ito ng mga táong nakatirá sa tabíng-ilog tulad ng mga unang Butuánon na nagmula pa sa mga pamayanan sa tabí ng Ilog Agusan at sa delta nito. Gayunman, sa pagdaan ng panahon, marami nang katutubong Butuánon ang lumipat at nanirahan sa mga bayan. Sa katunayan, sa Baryo Bagbag sa Lungsod Butuan matatagpuan ang pinakamalaking blang ng mga nagsasalita ng Butuánon.

          Sa kasalukuyan, itinuturing na moribund language o mamamatay nang wika ang Butuánon dahil sa pagbaba ng bílang ng mga nagsasalita nitó. Sa buong Lungsod Butuan, halos tatlong barangay na lámang ang gumagamit nitó, ang barangay Babag, Banza, at Maon, at tuluyan pang nababawasan dahil sa impluwensiya ng wikang Sebwano na mas gamitín sa lugar.