Higaúnon ang tawag sa wika ng grupong Higaúnon na isa sa pitóng pangunahing grupo sa lalawigan ng Bukidnon. Matatagpuan ang grupo sa Brgy. Hagpa at Brgy. Kalabugao, Lungsod Impasug-ong; Brgy. San Luis, Lungsod Malitbog, Cabanglasan, at Malaybalay, Bukidnon; Agusan del Norte, Misamis Oriental; Iligan, Lanao del Norte. 

          Bagaman isa ang Higaúnon sa mga pangkat na may pinakamalawak na sakop ng teritoryo at pinakamalaking bílang ng populasyon sa kanilang rehiyon, kasalukuyang bumababà ang bílang ng mga nagsasalita ng wikang ito. Ito ay dahil sa pagpili ng maraming Higaúnon na salitain ang mas maimpluwensiyang wika sa kanilang lugar, ang wikang Binisayâ, at ang pagkatuto ng wikang Filipíno at Inglés dahil sa edukasyon at impluwensiya ng midya. Dahil din sa intermarriage o pagpapakasal ng mga katutubong Higaúnon sa mga miyembo ng ibang pangkating etniko—tulad ng mga Bisayà, Ilónggo, Ilokáno, at Tagálog na pawang mga kalapit na grupo—ay patuloy na nababawasan ang bílang ng mga nagsasalita ng wikang ito.