Kalagán ang tawag sa wika at mga katutubong naninirahan sa Sirawan, Lungsod Davao; Lungsod Digos; mga bayan ng Hagonoy at Santa Cruz sa lalawigan ng Davao del Sur; Lungsod Panabo, Lungsod Tagum, at bayan ng San Isidro sa lalawigan ng Davao del Norte; Lungsod Mati, mga bayan ng Banaybanay at Lupon sa lalawigan ng Davao Oriental; at sa mga bayan ng Maco at Pantukan sa lalawigan ng Compostela Valley. Pinakamalaki ang bílang ng grupo sa Sirawan, Davao del Sur; sa paligid ng Tagum, Davao del Norte; Mati, Davao Oriental; at sa Compostela Valley. 

          Ang mga matatandang Kalagán ay patuloy sa paggamit ng kanilang katutubong wika lalo na iyong mga walang pagkakataóng makasalamuha ang ibang grupong naninirahan sa kanilang lugar. Ang mga mas batàng henerasyon naman, na madalas nakikisalamuha sa ibang grupo kayâ hindi maiwasang matutuhan nilá ang wika ng lahat o alinman sa mga grupong ito, ay nakapagsasalita ng Hiligaynón, Filipíno, at Inglés.