Inéte ang tawag sa wika ng mga katutubong Áti na naninirahan sa bayan ng San Jose, Romblon; Brgy. Igcalawagan, Dao, Tobias, Fornier, Antique; at Cubay Sur, Aklan. Kilalá rin ang wikang Inéte sa tawag na Ináti.
Mataas ang pagtingin ng mga katutubong Áti sa kanilang wika, at patunay rito ang paggamit nilá ng wikang Inéte sa loob ng tahanan at sa kanilang komunidad. Gumagamit rin silá ng wikang Hiligaynón na lingua franca sa kanilang lugar. Ilan sa kanila, lalo na iyong mga nakapag-aral, ang marunong rin ng Filipíno at Inglés.