Paláw-an ang tawag sa wika ng mga katutubong Paláw-an na naninirahan sa iba’t ibang barangay sa mga bayan ng Aborlan, Bataraza, Brooke’s Point, Quezon, Rizal, at Sofronio Española sa lalawigan ng Palawan.

Ilan sa kilalang varayti ng Paláw-an ay ang Paláw-an Brooke’s Point na sinasalita sa Barangay Maasin at Barangay Ipilan, partikular sa Sitio Linao, sa bayan ng Brooke’s Point at bayan ng Quezon; ang Paláw-an Sentrál sa mga barangay ng Berong, Panitian, Tabon, at Tagusao sa bayan ng Quezon at sa mga bayan ng Aborlan, Rizal, at Sofronio Española; ang Paláw-an Timog Kanluran na sinasalita sa mga barangay ng Bono-bono, Bulalacao, Kulandanum, Malihod, Marangas, at Sandoval sa bayan ng Bataraza.

Wikang Paláw-an ang unang wikang natututuhan ng mga katutubong Paláw-an.  Sa labas ng komunidad ay natututuhan nila ang Filipíno at Inglés na mga wikang panturo sa paaralan.