Sinadánga ang wikang sinasalita ng mga katutubong Isadánga na naninirahan sa Sadanga, Mountain Province. 

Sinadánga ang pangkalahatang wika sa bayan ng Sadanga na binubuo ng sumusunod na barangay—Anabel, Belwang, Betwagan, Bekigan, Poblacion, Sacasacan, Saclit, at Demang—bagaman nagkakaiba-iba ang paraan ng pagsasalita nitó sa mga barangay kung kayâ may mga umusbong nang varayti ng wikang ito. Bukod dito, nakaiintindi at nakapagsasalita rin ng Filipíno at Inglés ang mga Isadánga dahil sa edukasyon at impluwensiya ng Simbahang Katolika sa kanilang lugar. Marunong rin ng Ilokáno ang mga Isadánga dahil ito ang lingua franca sa lalawigan.