Ang Yákan ay ang wika ng mga katutubong Yákan na naninirahan sa mga bayan ng Lamitan, Tuburan, Tipo-tipo, Sumisip, at Isabela sa lalawigan ng Basilan; sa Sulu; sa Isla ng Siakol, Lungsod Zamboanga; at sa ilang bahagi ng Zamboanga del Sur.

          Bukod sa kanilang katutubong wika, nakaiintindi at nakapagsasalita rin ang mga Yákan ng wikang Bahása Sug at Chabacano. Natututuhan naman nilá ang Filipíno at Inglés na mga wikang panturo sa paaralan.