Ang Agtâ Dumágat Casigúran ay ang wika ng grupong Agtâ Dumágat Casigúran na naninirahan sa lalawigan ng Aurora, partikular sa bayan ng Dinalungan, Casiguran, at Dilasag (DICADI); at sa bayan ng Palanan, Isabela. Kilalá rin ang mga Agtâ Dumágat Casigúran sa tawag na Dumágat. 

Bukod sa kanilang katutubong wika, marunong rin ang mga Dumágat ng wikang Tagálog na lingua franca sa lalawigan. Natututuhan rin nilá ang wika ng mga kalapit na grupo tulad ng mga Kasiguránin at Ilokáno. Ang nakababatàng henerasyon naman, lalo na iyong mga nakapag-aral ay marunong ng Filipíno at Inglés na ginagamit na mga wikang panturo sa paaralan.