Ang Iránun ay ang wika ng grupong Iránun na naninirahan sa lalawigan ng Maguindanao, Hilagang Cotabato, Timog Cotabato, Sultan Kudarat, Zamboanga del Sur, at Bukidnon. May mga Iránun ding matatagpuan sa mga baybáyin ng Look Illana na bahagi ng Dagat Celebes. 

          Ang Iránun ay bahagi ng subfamily ng wikang Danáw na binubuo ng Mëranaw at Magindanáwon. Liban sa Pilipinas, sinasalita rin ang wikang ito sa halos lahat ng bahagi ng Kota Belud at sa ilang lugar sa Lahad Datu sa Sabah, Malaysia.

          Bukod sa Iránun, nakapagsasalita rin ang mga katutubong Iránun ng Chabacano, Mëranáw, Málay, Filipíno, at Inglés.