Ang Irungdúngan ay ang wika ng mga katutubong Agtâ Isirígan—isa sa tatlong grupo ng mga Agtâ na naninirahan sa lalawigan ng Cagayan. Matatagpuan silá partikular sa Annip, Rizal; Pamplona; Sanchez Mira; Ballesteros; Claveria; Allacapan; Lasam; at Abulug. 

Mataas ang pagtingin ng mga Agtâ Isirígan sa kanilang wika, at patunay riyan ang paggamit nilá nitó sa loob ng tahanan at sa kanilang komunidad. Irungdúngan ang wikang unang natututuhan ng mga batàng Agtâ Isirígan, kasunod ang Ilokáno na linggwa frangka sa kanilang lugar. Natututuhan din nilá ang wika ng mga karatig na grupo tulad ng Itáwit at Malawég. Pagtuntong sa paaralan, natutuhan naman nilá ang mga wikang panturong Filipíno at Inglés.