Ang Manidé ay ang wika sinasalita ng mga Kabíhug—isang grupo ng mga Agtâ na naninirahan sa Camarines Norte, partikular sa barangay Abatuhan, Malaya, at Bagong Silang sa bayan ng Labo; Barangay San Lorenzo sa bayan ng Santa Elena; Barangay San Jose at Osmeña Tamisan sa bayan ng Jose Panganiban; Barangay Capacuan at Pinagbirayan sa bayan ng Paracale; at sa Barangay Alayao sa bayan ng Capalonga. Kilalá rin silá sa mga tagalabas sa tawag na Abiyan. 

Matatagpuan sa mga bayan ng Santa Elena at Labo, Camarines Norte ang pinakamalaking bílang ng mga gumagamit ng wikang Manidé. Bukod sa kanilang sariling wika, nakauunawa at nakapagsasalita rin ang mga Kabíhug ng Tagálog at Bíkol—mga wikang sinasalita sa mga karatig-pook at sa kalakhang Bicol.