Manóbo Ilyánen ang tawag sa wika ng mga katutubong Manóbo Ilyánen na naninirahan sa mga bayan ng Pikit, Aleosan, Midsayap, Libungan, Pigkawayan, Alamada, Banisilan, Carmen, President Roxas, Antipas, Arakan, Matalam, at Kabaca sa lalawigan ng Cotabato. Arakan, Livungaen, at Pulangiyan ang mga kilaláng diyalekto ng wikang ito.

          Bukod sa Manóbo Ilyánen, marunong ding magsalita ang mga katutubo ng Binisayâng Mindanáw, Filipíno, at Inglés. Natututuhan nilá ang Binisayâng Mindanáw mula sa pakikihalubilo sa ibang grupo hábang natututuhan naman nilá ang Filipíno at Inglés bílang asignatura at mga wikang panturo sa paaralan.