Ang Masbatényo ay ang wikang sinasalita ng mga Masbatényo at iba pang grupo sa halos buong lalawigan ng Masbate maliban sa mga bayan sa timog-kanlurang bahagi ng lalawigan na isang varayti ng Sebwáno ang sinasalita, ang Masbatényong Binisayâ.

          Dahil binubuo ng tatlong isla ang lalawigan ng Masbate—ang Burias, Masbate, at Ticao—umusbong ang tatlong varayti ng wikang Masbatényo na sinasalita sa bawat pulo. Bukod sa mga varayting ito, sinasalita rin sa lalawigan ang Bíkol, Waráy, Hiligaynón, Filipíno, at Inglés.