Manóbo Áta ang tawag sa wika ng mga katutubong Manóbo sa Mindanao, partikular ang mga naninirahan sa mga bayan ng Talaingod, Marilog, Paquibato, Panabo, Carmen, Santo Tomas, at Kapalong sa lalawigan ng Davao del Norte. Tinatawag rin sa parehong pangalan ang grupo— Manóbo Áta—bagaman kilalá rin silá sa mga tagalabas sa mga pangalang Áta ng Davao, Áta Manóbo, at Langílan. 

Napalilibutan ng mga grupong Sebwáno at Mandayá ang lugar ng mga Manóbo Áta kung kayâ bukod sa kanilang katutubong wika, marunong din silá ng mga wikang Sebwáno, Mandayá, at barayti ng Binisayâng Mindanáw.