Na patturak anna pabbibbid si sapit a Gaddang e kurwa madiyat ingke. So appasa na pattaruntufad na diyafuwan ira, nepattaddan a iyaweno tata so pakegafuwan nu saay a amme iyaw a usa-usan na abbing ira sitoye.
Si ngān na ammin a Gaddang na Northern Nueva Vizcaya, Paracelis na Mountain Province, Southern anna Southwestern Isabela, iyaw a mensahe e tata a pammabala-balatmi sitaw a tumuntufad:
1) Komisyon sa Wikang Filipino (KWF); 2) Translators Association of the Philippines, Inc. (TAP); 3) Department of Education (DepEd); 4) Nueva Vizcaya Gaddang Indigenous People’s Organization, Inc. (NVGIPO); anna 5) National Commission on Indigenous People (NCIP).
Na pammabala-balat e maawag a parefu a takkilalan ino tumuntufad ira: 1) Dr. Purificacion Delima, Komisyoner, anna Earvin Christian Pelagio, Mananaliksik-Wika na KWF; 2) Dr. Josephine Daguman, Senior Consultant in Field Linguistics, TAP; 3) Bb. Noemi Dumalaug, Director of Language, Education, and Development na TAP anneno TAP Language Development Team, 4) G. Alfred Mijares at Gng. Racquel Mijares na TAP anneno gumassalin si Bibliya a Gaddang a ira Gng. Niltrudes T. Lascota, Gng. Marylinda C. Ramos, Pedro Ben I. Gurat Jr., anneno Mestra ira anna Mestruwera na DepEd, Sangay ng Nueva Vizcaya, Paracelis na Mt Province, Southern anna Southwestern Isabela anneno manannakamda. Annanot si amminan, mappabala-balatak sike Gng. Norla S. Valdez, Gaddang Taskforce na Nueva Vizcaya, Principal na Bayombong West Elementary School anna Gng. Marilou G. Tugade, Principal na Sta. Rosa Elementary School. Ira ino namefu a nangwa si Ortografiya na Gaddang.
Tammalonggonna ino pangitunturu si sapit na Gaddang anna amme mabbayag umodduwenna ino makaabid si sapit a Gaddang gumafu si ortografiya.
Diyos mabbalat!
JOSE B. TAMANI, DPA, CESO III
Afu-Afu, NVGIPO
So pattataratayu a tata natural a Gaddang a ana pelamang gagangena anneno pakkumanan si pangwa na Ortografiya na Gaddang e kaangga-anggam. Mepangngat iyaw a melawa anna medayaw. Iyaw a mapiya a inangwayu e mangipaita si pidduk so sapit diyaw anna so kawayan diyawera.
Ipannokkalku payeno Gaddang ira sito probinsiyatam a Nueva Vizcaya a nammung so kakunnara a Gaddang a naggabwat si Isabela anna Mountain Province tapenu padduruffunandeno akkabalinna yo Ortografiya na Gaddang. So duffun anna tiyempu a neyaddayu, mattalakak a maparulot ammin ino gakkad diyaw a amme matawataweno gagangeyu anna pakatakkilalan diyaw a ikkayu e tata a Gaddang.
Gumafu sitaw e mapatuyag kepayeno nassittatan a pabbufurulun diyaw. Sapitangku sikwayu a tataak pay a manuffun a mappalabwak so gagangeyu anna kapiyanan na Gaddang e màerensiyayuna. Dandammangku a akwan ino pammakapiyan diyaw a naggabwat sike Diyos a namaratu sikwatam.
Bulungku i Ruth Raña Padilla a atawak a na-Gubernador na lubbuntam. Nanuffun pay so kaawan na Gaddang ira anneno gagangay na tarubbunan meantu so PRAYERS AND FAITH Development Agenda na gobyernutam a parefumi a iballay sikwayu e bulummi payeno tallu a anakmi. Idasa-dasalku sike Ama a Makapangwa a indannakayu si pammakapiyan!
Mattolay yo Gaddang!
CARLOS M. PADILLA
Gobernador, Nueva Vizcaya
Dayawangku ammin a kapaleyan na Gaddang si kaanana iyaw a programa a mapapaddat ino negagangay a akkatolay, tradisyon, anna iyakkatolay ino makasta a kostumbre.
Ino Gaddang e tata prominente a grupu na etnolingguwistiko na Nueva Vizcaya, Isabela, anna korwan kepay a lugar na Rehiyon 2. Sitoye, damana a matawataw iyaw a sapit na Gaddang nu ammetam mabbbafurulun a mapatuyag iyaw. Udde ammuk a amme iyaw a medemmu gumafu se makasta ino gakkad diyaw a mapatuyag iyaw megafu si akkeyangwana yo Ortografiya na Gaddang. Mangurugak ingke a megafu sitaw, ibali-balin na tumuntufad a diyafuwan ira na Gaddang ino napefunan diyaw.
Ikkanak, a Schools Division Superintendent diyaw sitaw a Dibisyon na Nueva Vizcaya, inanaman diyaw yo annuffungku sikwayu.
Parennad se madutung diyaw ino makasta a gakkad diyaw ira takesi maimuran diyaw ino negagangay a akkatolay na Gaddang.
Inanamangku ingke ino akkekastana iyaw a programa.
Mamitta imman, mattolay yo Gaddang!
FLORDELIZA C. GECOBE PhD, CESO V
Schools Division Superintendent
Dibisyon na Nueva Vizcaya
Kagawaran na Edukasyon
Upang maakses ang tampok na ito ng website, kinakailangang magrehistro upang magkaroon ng akawnt.